weather

USD 2.05

EURO 2.2619

RUR(100) 3.1842

search

Дом згарэў, а страхоўку атрымаць – праблема

Без жылля і нават без абутку застаўся пенсіянер Рыгор Дулік з вёскі Любашава пасля пажару, які здарыўся ў панядзелак 22 красавіка. Ад дома засталіся толькі абгарэлыя сцены і для пражывання ён зусім не прыдатны.

 Дом згарэў, а страхоўку атрымаць – праблема
Дом згарэў, а страхоўку атрымаць – праблема / Фото: Пётр Гузаеўскі

Інфармацыя аб пажары паступіла пасля 18 гадзін. Праз некалькі хвілін журналіст “ГЧ” быў на месцы. Полымя шугала так, што маглі загарэцца два суседскія дамы. У людскім натоўпе, які сабраўся на пажары, некаторыя прысутныя абураліся, што адна пажарная машына вельмі хутка выліла воду і паехала запраўляцца, а іншыя яшчэ не падаспелі.

Як высветлілася пазней, машыны былі задзейнічаны на іншых пажарах. Супрацоўнік Ганцавіцкага РАНС прасіў людзей прынесці вёдры, каб паліваць суседнія хаты: на адной з іх ад высокай тэмпературы ўжо плавілася пластыкавая абшыўка каля страхі. Але большасць прысутных не зрушыліся з месца, глядзелі на палаючую хату, здымалі пажар на мабільнікі. Толькі некалькі чалавек пабеглі і пачалі вёдрамі насіць з калодзежа ваду і заліваць полымя.

Канешне, іх старанні былі малаэфектыўнымі, але, паліваючы сцены дамоў, яны выйгралі хоць некалькі хвілін да прыезду пажарных. На тушэнне пажару прыехалі чатыры пажарныя машыны: з Люсіна, Ганцавіч, Галынкі (Клецкі раён), Тальмінавіч (Ляхавіцкі раён). І хутка пажар быў ліквідаваны.

Дом згарэў, а страхоўку атрымаць – праблема
Дом згарэў, а страхоўку атрымаць – праблема / Фото: Пётр Гузаеўскі

Рыгор Дулік босы, у шкарпэтках, хадзіў па дарозе, глядзеў, як дагарае хата, і прыгаворваў:

“Вось дзе мне зараз жыць? Босы застаўся, туфлі і вопратка згарэлі. У чым ёсць выскачыў з хаты, бо ў сярэдзіне яе ўсё гарэла”.

Ён сказаў, што ўзгаранне пайшло ад тэлевізара. Па словах вяскоўцаў, Рыгор з суседам у той самы дзень нешта адзначалі і выпівалі. Хата належала яго пляменніку Ігару Дуліку, які прытуліў дзядзьку, і была застрахавана. Але на другі дзень, калі ўласнік дома звярнуўся за афармленнем страхоўкі, узніклі праблемы.

Па словах Ігара Аляксандравіча, у страхавой кампаніі “Белдзяржстрах” адказалі, што страхавой выплаты не будзе, бо Любашаўскі сельвыканкам выдаў даведку, што дом нежылы.

“Як гэта нежылы!? – абурыўся Ігар Дулік. – Усе гады я спраўна плаціў падаткі на нерухомасць, на зямлю, страхоўку, і тут рэзка дом стаў нежылым?”

Канешне, з такім ходам справы Ігар Аляксандравіч мірыцца не стаў і ў сераду напісаў заяву ў Любашаўскі сельсавет, каб выдалі даведкі, колькі ён заплаціў падаткаў за зямлю і за жылы дом. Пасля таго, як ён звярнуўся асабіста, яму выдалі даведку, што дом «не заселены на пастаяннай аснове і выкарыстоўваўся для часовага пражывання».

Ігар Аляксандравіч таксама звярнуўся ў “Белдзяржстрах”, каб там пацвердзілі і выдалі копіі плацёжных дакументаў абавязковага страхавання. Дырэктар “Белдзяржстраху” Сяргей Віннік паабяцаў разабрацца.

Па словах І. Дуліка, у Любашаўскім сельсавеце ўзнік канфлікт. Калі ён прыйшоў з просьбай, каб выдалі даведку, якая адпавядае фактычным абставінам, работнік сельвыканкама выклікала міліцыю за тое, што яго сябра вёў відэазапіс. Калі вярстаўся нумар, участковы міліцыянер якраз разбіраўся з гэтай справай. Уладзімір Занька, сябра Ігара Дуліка, паведаміў пра гэта «ГЧ».

«Сельсавет – гэта грамадскае месца, а старшыня сельсавета – дэпутат, дзейнасць якога па законе галосная і адкрытая. І здзіўляе тое, што мясцовая ўлада хаваецца ад людзей і нечага баіцца», – сказаў Уладзімір.

Як і чым закончыцца справа, паведамім пазней.

comments powered by HyperComments
Материалы по теме
Из рубрики