weather

USD 2.5002

EURO 2.934

RUR(100) 3.4289

search

Дырэктар рыбгаса «Лактышы» вінаваціць дарожную службу

На мінулым тыдні службовы аўтамабіль “Ніва” рыбгаса «Лактышы», якім кіраваў дырэктар рыбгаса, з’ехаў у кювет, перавярнуўся і быў пашкоджаны. Акрамя вадзіцеля, у салоне было яшчэ два пасажыры. Здарэнне адбылося раніцай каля 8 гадзін 20 хвілін у вёсцы Шашкі.

Кіраўнік рыбгаса Сямён Шуст лічыць, што прычынай аварыі стаў галалёд, і звярнуўся з заявай у міліцыю. Ён патрабуе прыцягнення да адказнасці работнікаў ДРБУ-100, якая абслугоўвае аўтадарогу Н-1.

Як расказаў Сямён Васільевіч, рухаўся ён з невялікай хуткасцю, пры спуску з горкі пасля павароту машыну пачало круціць у розныя бакі. Ён прымяніў тармажэнне, але дарога была вельмі слізкая і машыну панесла ў кювет.

«Калі знесла з дарогі на абочыну, думаў, што здолею яе выраўнаваць і ўтрымацца. Але калі аўтамабіль амаль спыніўся, ён нахіліўся на бок і перавярнуўся», – расказаў “ГЧ” вадзіцель.

На шчасце, усё абышлося невялікімі драпінамі: кіроўца і пасажыр атрымалі парэзы рук ад разбітага шкла. Пасажыр, які знаходзіўся на заднім сядзенні, не пацярпеў. А вось у аўтамабіля моцна пашкоджаны кузаў, патрабуецца замена лабавога шкла і фар. Тое, што на дарозе быў галалёд – гэта факт.

Калі аўтар гэтага артыкула ехаў на аўтамабілі да месца здарэння, участак дарогі ад вёскі Агарэвічы і да вёскі Шашкі быў падобны на каток. Тэхніка арганізацыі, якая абслугоўвае аўтадарогу, пасыпала яе солева-пясчанай сумессю пасля 10 гадзін.

Па словах работнікаў ДРБУ, па нормах падсыпка на такіх дарогах павінна праводзіцца на працягу дзевяці гадзін з моманту ўзнікнення галалёду. Але ён, па іх словах, утварыўся толькі з раніцы.

Начальнік філіяла КУП «Брэстаблдарбуд» Ганцавіцкае ДРБУ № 100 Алег Дайлід лічыць прэтэнзіі дырэктара рыбгаса беспадстаўнымі. На думку Алега Рыгоравіча, прычын, па якой вадзіцель не справіўся з кіраваннем, можа быць мноства.

“Няхай праводзяць праверку, ці выбраў вадзіцель бяспечную хуткасць, ці працавала ў ім тармазная сістэма і ці быў пройдзены тэхагляд”, – сказаў Алег Дайлід.

Чым завершыцца разбіральніцтва, высветліцца пасля праверкі, якую праводзіць аддзяленне ДАІ Ганцавіцкага РАУС.

Из рубрики
Top