Пенсіянерам падымаюць пенсіі, але ці радуюцца яны гэтаму?

Вядома, што, каб заручыцца іх падтрымкай, трэба рабіць усё так, каб ім было камфортна і ўтульна, так як у сталога чалавека шмат турбот і перажыванняў.

З лютага месяца гэтага года таксама адбылося чарговае павелічэнне пенсій. Што адчулі пенсіянеры ў сваіх кішэнях? Ці задаволеныя памерамі сваіх пенсій? З гэтымі пытаннямі мы звярнуліся да некаторых ганцаўчан пенсійнага ўзросту.

ВЫКАЗВАННІ ГАНЦАЎЧАН

ПАКУЛЬ ТРЫМАЕМСЯ

«Вось толькі што прыйшло смс аб залічэнні пенсіі – 406,14 рубля. Яна такая самая, як і ў мінулым месяцы. Але я маю падпрацоўку на рынку: гандлюю рознай дробяззю. Хоць справы з продажам не вельмі, але пакуль трымаемся. На пенсію я выйшла ў 55 год, а зараз мне 63 гады», – кажа Валянціна.

У СНЕЖНІ ДАДАЛІ 7 РУБЛЁЎ З КАПЕЕЧКАМІ

«Маёй маці, Мялюк Марыі Аляксандраўне, 82 гады. Калі ёй споўнілася 80, тады ёй дадалі па ўзросце 50 рублёў. Але ў яе заўсёды была малая пенсія, бо яна адпрацавала ўсё жыццё паляводам у калгасе.

Аб’ём яе пенсіі да 80 гадоў складаў 278 рублёў, а пасля павышэння стаў складаць амаль 330 рублёў. У снежні мінулага года таксама адбылося павышэнне, дадалі 7 рублёў з капеечкамі», – распавядае Лілія Станіславаўна Агейка.

ЗАРАЗ МАГУ НАБЫЦЬ ЛЮБЫ ХЛЕБ

«Мая пенсія не павысілася. Якая была, такой і засталася – 430,29 рублёў», – тлумачыць Марыя Іванаўна Зялёнка, якая раней працавала ў дзіцячым садку №2. — «Бягучым радком па тэлебачанні я бачыла, што з лютага адбудуцца павышэнні пенсій. Але мне так падалося, што павышаць пенсіі будуць інвалідам і маламаёмасным катэгорыям грамадзян.

Хоць у глыбіні душы і я спадзявалася на павышэнне. Я памятаю складаныя 90-я гады і тое, як тады было ўсім кепска. Затое цяпер магу купіць любы хлеб. Пенсію ашчадна размяркоўваю, бо трэба набываць лекі, аплачваць паслугі ЖКГ, а яшчэ пражыць на яе».

ПА ДЗЕСЯЦЬ РУБЛЁЎ ЗА ГОД РАБОТЫ…

«Як атрымліваў 420 рублёў, так і атрымліваю», – распавядае Васілій Мікалаевіч Занька. – «Па тэлебачанні бягучым радком паказалі, што з лютага пенсія павінна павысіцца на 3,6 рублі. Але ж усё засталося на папярэднім узроўні.

Я маю 42 гады працоўнага стажу. Працаваў усё жыццё ў сельскай гаспадарцы: і брыгадзірам, і аграномам, і загадчыкам фермы ААА “Бярозавец”. Але што з таго? Пенсіі мне не хапае! Усё даражае амаль з кожны дзень, прыходзіцца зводзіць канцы з канцамі. А яшчэ дзецям трэба неяк дапамагаць».

НЕКАТОРЫЯ ВЫКАЗВАННІ ПРЭЗІДЭНТА НА ПЕНСІЙНУЮ ТЭМУ

Аб пенсіянерах трэба памятаць заўсёды. Гэта зона нашай адказнасці. Пенсіянеры, дарогі, інфраструктура і іншае – гэта наша святая справа». 2015 год

***

Зарплата ў людзей невысокая і не расце па краіне. А пенсійны фонд фарміруецца з зарплаты. Калі не расце зарплата, жыццёвы ўзровень падае. Стаіць пытанне: што рабіць? Памяншаць пенсіі? На гэта мы пайсці не можам. Нельга крыўдзіць людзей». 2016 год

***

Заробкі і пенсіі могуць быць павялічаны толькі тады, калі ў эканоміцы зробім больш, якасней і прададзім па больш высокай цане. Ёсць другі шлях: можна ў каго-небудзь пазычыць, адабраць, узяць. Але гэта не наш шлях. У нас і так запазычанасць значная – дзяржаўная, карпаратыўная і г. д. Асабліва спадзявацца на тое, што мы будзем пазычаць і за кошт гэтага павышаць зарплаты і пенсіі, не варта». 2017 год

***

Урад палічыў, што ў гэтым годзе рэальна павысім пенсіі на 8 – 9%. Гэта будзе нядрэнна. Але трэба рухацца і далей. У будучым годзе мы плануем, што заработныя платы ў нашай краіне пераваляць за 1000 рублёў за кошт таго, што мы падымем заработную плату малааплачваемых слаёў насельніцтва». 2018 год

***

Трэба памятаць, што ад зарплаты тых, хто працуе, залежыць дабрабыт людзей старэйшага ўзросту. Для большасці з іх пенсія – адзіная крыніца даходаў.У 2018 годзе тройчы павялічаны пенсіі. Іх рост павінен быць і ў 2019 годзе. Даручаю ўраду не адкладаючы падрыхтаваць праекты неабходных рашэнняў». 2019 год

***

Усе мы будзем пенсіянерамі. Маладымі мы ўжо не будзем. Таму трэба пенсіянераў трошкі падтрымліваць. Нашы беларускія пенсіянеры кажуць, што грошай не хапае на тое і на тое, а дзецям у кулачок ці ў кішэню пакладуць». 2019 год, Баранавічы