Свята вёскі з сюрпрызамі

Падчас свята вёскі Вялікія Круговічы сваё залатое вяселле адзначылі Віктар Адамавіч і Яніна Канстанцінаўна Трафімчыкі / Фото: Ирина Домарацкая

Героямі гэтай прыемнай падзеі  сталі Віктар Адамавіч і Яніна Канстанцінаўна Трафімчыкі. Арганізатары падарылі юбілярам унікальную магчымасць – успомніць маладосць і згуляць ізноў вяселле, ды не звычайнае, а залатое.

Як і паўстагоддзя назад, жаніх з нявестаю сталі на рушнік і распісаліся ў кнізе рэгістрацыі аб тым, што заключаюць шлюб. Розніца была толькі ў тым, што рушнік перад імі рассцілалі не сведкі, а іх унукі. Рэгістрацыя залатых юбіляраў атрымалася вельмі цікавай і відовішчнай. Вопытныя жаніх з нявестаю не саромеліся, цалаваліся на сцэне па першаму закліку “горка”, а потым спраўна танцавалі парны танец. У фінале цырымоніі арганізатары ўручылі юбілярам падарункі, а маладыя пачаставалі гасцей свята сваім караваем.

Свае юбілейныя вяселлі ў жніўні адзначылі яшчэ чатыры сямейныя пары. З рубінавым вяселлем, якое адзначаецца праз 40 гадоў пасля жаніцьбы, арганізатары павіншавалі Мікалая Мікалаевіча і Ядзвігу Мікалаеўну Аскеркаў.

З жамчужным вяселлем, адзначаемым праз 30 гадоў пасля вяселля, павіншавалі ажно тры пары: Аляксандра Адамавіча і Валянціну Іосіфаўну Заяц; Аляксандра Мікалаевіча і Ганну Канстанцінаўну Гардзей; Анатоля Віктаравіча і Валянціну Адамаўну Літоўка. І самым маладым ў гэтай намінацыі аказаўся жыхар вёскі Руслан Хілько, які ўзяў шлюб ўсяго некалькі тыдняў назад 7 жніўня.

На свяце таксама былі названы імены самых старэйшых і малодшых вяскоўцаў. На званне самага старэйшага было два прэтэндэнты: Уладзімір Ільіч Рапейка і Елізавета Антонаўна Студзент, якім спонілася па 98 гадоў. Самы малодшы – Міхаіл Дмітрыевіч Занька, які нарадзіўся 15 жніўня.
У конкурсе на лепшы падворак лепшымі сталі сем’і Дзмітрыя і Зінаіды Гайцюкевіч, а таксама Яўгена і Людмілы Лелес, у падарунак атрымаўшыя прыгожай люстры.

З прызамі і падарункамі вярталіся са свята і іншыя вяскоўцы, якія актыўна ўдзельнічалі ў розыгрышах і конкурсах. Асабліва пашанцавала, па мерках вяскоўцаў, на свяце настаўніцы Марыне Пакумейцы. Яна адзіная выйграла такі прыз, што ў руках не панясеш. Падарункам аказаўся прычэп дроў, які яна купіла за адну манету. Па ўмове конкурсу прыз дастаўся ўладальніку самай дрэўняй грашовай адзінкі. Такі экзатычны конкурс і прыз прапанаваў спонсар свята начальнік Ганцавіцкага ПМС Аляксандр Шут. Вельмі актуальныя для вёскі падарункі выставіў А. Шут і на аўкцыён. Не ведаючы, за што таргуюцца, удзельнікі аўкцыёна даволі танна «пакуплялі» такія прызы, як куртка, рабочы касцюм, рабочы халат, банны ручнік і іншыя дробязі.

Не менш азартна прайшла бяспройгрышная латарэя. Кожны выйграў прыз, сярод якіх разыгрываліся ручкі, кубкі, пакеты з зернем. Хто не рызыкнуў гуляць у латарэю, той мог пачаставацца за свае грошы ў імправізаванай карчме, дзе спраўная гаспадыня прапаноўвала гасцям пачаставацца шашлыкамі, рыбнай юшкай, выпечкай, цукеркамі, блінамі з мёдам, хлебным квасам, сокамі і іншымі напіткамі. Увогуле, кожны госць свята мог сябе праявіць і рэалізавацца не толькі ў карчме, але і на сцэне, было б жаданне і настрой, а арганізатары ў гэтым годзе пастараліся як ніколі.

“Такога цудоўнага свята ў нас даўно не было, – расказала жыхарка вёскі Святлана Сідарэвіч, – усё настолькі цікава зроблена, што дамоў ісці не хацелася”.