search

Абласное свята прайшло пад “дахам” Ганцаўшчыны (Фотагалерэя)

Галоўнай падзеяй Ганцаўшчыны на мінулым тыдні стала абласное свята сямейнай творчасці “Пад дахам дома твайго”, якое прайшло ў райцэнтры. У нядзелю на плошчы і ў парку не сціхалі песні, а сталы “ламаліся” ад розных ястваў і прысмак.

Image 634
Image 634 / Фото: Петр Гузаевский

Упершыню ў Ганцавічы з’ехаліся сямейныя калектывы з усёй Брэстчыны і самадзейныя артысты міншчыны і магілёўшчыны. На працягу двух дзён на пляцоўках яны дэманстравалі сваё майстэрства. Удзельнікі і госці свята змаглі пазнаёміцца з выставай народнай творчасці і нацыянальнай кухні, прыняць удзел у забаўляльных праграмах.

У першы дзень свята гаспадары-ганцаўчане віталі гасцей з фальклорных калектываў і народных умельцаў — удзельнікаў “Горада майстроў”. Адразу ж пасля цырымоніі адкрыцця, сямейныя калектывы прадставілі свае “візітныя карткі”: у Доме культуры загучалі тэмпераментныя прыпеўкі, душэўныя народныя песні.

На наступны день спрыяла і надвор’е – было цёпла і свяціла сонейка. Адзінае, што засмучала і кідалася ў вочы, што ўдзельнікаў свята было больш, чым гледачоў. Ды і тыя, негледзячы на тое, што на плошчы вісела палотнішча і развешаны аб’явы, не ведалі да чаго прымеркавана свята. Адны меркавалі, што гэта да Дня незалежнасці, іншыя казалі, што рэпетыцыя перад рэспубліканскім святам да Дня беларарускай пісьменнасці, а многія ўвогуле лічылі, што гэта перад выбарамі народ весяляць, тым больш, што ў радах сярод выставаў майстроў розных промыслаў, стаялі актывісты са стэндам і  збіралі подпісы ў падтрымку прэтэндэнта на пасаду прэзідэнта Уладзіміра Некляева.

Аднак вельмі многія дакладна так і не маглі адказаць, на якое мерапрыемства яны прыйшлі. “Інфармацыі пра мерапрыемства было недастаткова, я пра яго даведаўся толькі калі выйшлі з сям’ёй на рынак, пачулі музыку і прыйшлі на свята. Паболей плакатаў трэба вывешваць, — сказаў ганцаўчанін Мікалай Крысюк – А свята, дык наогул цудоўнае. Мы добра павесяліліся. Не прыкмецілі, як час праляцеў”.

Праграма была насычанай. Яна не абмяжоўваўся толькі конкурсам сярод сямейных калектываў. Тут былі прадстаўленыя практычна ўсе выгляды народнай творчасці: музыка, танец, ткацтва, вышыўка, саломапляценне і бісерапляценне і народная кухня.

На пляцоўках вакол плошчы разгарнуўся пярэсты шумны кірмаш, на якім былі прадстаўлены вырабы народных умельцаў, а ў імправізаваных вясковых падворках прымалі гасцей мясцовыя фальклорныя калектывы і з Берасцейшчыны. У цэнтры плошчы ішлі выступы артыстаў, а ў некаторых палатках былі бяспроігрышныя латарэі, і “планета прыколаў”, дзе можна было купіць “падколку” сабе ці сябрам.

Большасць ганцаўчан і гасцей разышліся па вуліцам горада вакол плошчы, дзе мясцовыя артысты так і госці з Берасцейшчыны дэманстравалі хто на што гаразд – ад культурнай праграмы да выпіўкі з закуссю. Блага, падчас свята за ўжыванне спіртных напояў ў грамадскім месцы нягласна “адмянілі”. Кампаніі распаўсюджваліся ўсюль – ля сталоў, у парку, на лаўках, ля сталоў і нават на траве.

Артысты весялілі народ. Кожная пляцоўка вабіла гасцей чымсці сваім – дзе смачнымі стравамі, дзе народнімі песнямі, дзе вясёлымі розыгрышамі.  Бадай, самай вясёлай пляцоўкай многія ганцаўчане называлі артыстаў з Малькавіцкага сельсавета. Вынаходнікі-малькаўцы разыгралі сапраўдны спектакль: у сям’і маладажонаў “дырэктар рынка” гандляваў, а яго цяжарная жанчына з грудным дзіцем збірала ахвяраванні “на памперсы”. Другая “жанчына”, таксама цяжарная, ўпраглася ў гужавую павозку і амаль некалькі гадзін займалася прыватным ізвозам – за паўтары тысячы прытанцоўваючы вазіла па плошчы. За “чырвонец” магла давезці і да мікрараёна. Даражэй, канешне, чым у Бусла на таксі, але ж экзотыка… А ў перапынку паміж рэйсамі “кабылка” яшчэ і танцавала. Ганцаўчане ахвотна давалі грошы, а таксама затрымліваліся паслухаць гарманістаў і барабаншчыка, патанцаваць, ці паспытаць гарачых дранікаў са смятанай, якія жарыліся тут жа, на плітцы.

Каля любашаўскай пляцоўкі многія затрымліваліся, каб выпіць шклянку наліўкі і прыкусіць… лыжкай кашы, якая каштавала ўсяго 50 рублёў. А яшчэ знатным блюдам у іх была поліўка з сухімі грыбамі і аладкамі, ад паху якой спараздныя гурманы не маглі утрымацца, каб не паспытаць.

Міма Нацкага Сельскага савета людзі не маглі прайсці міма, каб не паслухаць мясцовых артыстаў – Леаніда Пісарыка і Аляксандра Завадскага, якія пелі “ўжывую”, і пакаштаваць шашлыкоў пад настойкі на травах с градусам.

Лактышоўцы частавалі гасцей сваімі кароннымі блюдамі – рыбнымі стравамі. Юшкі кіраўнік аматарскага аб’яднання “Аквафіл”, якога ўсе клічуць Наумавіч, наварыў 40-літровую флягу. А тыя, хто завітаў на пляцоўку да люсінцаў, маглі не толькі пачаставацца надзвычай смачнымі налістнікамі, рагалікамі і аладкамі, якія напяклі старшыня сельсавета Аляксееўна і сакратар Філімонаўна, але і патанчыць і паслухаць песні. Тут жа паблізу разліваліся спевы галасістых дзяніскавіцікх дзяўчат, якія не выпускалі амаль нікога “жывым” без пачастункаў. За імі на правым флангу “трымалі абарону” раздзялавіцкія і хатыніцкія майстры і артысты. Іх сталы і пачастункі былі на самы розны густ: дыетчыкам яблыкі і журавіны, аматарам сур’ёзнага падыходу да ежы – сала, дранікі са смятанай.

Карэспандэнты “ГЧ” пабывалі на усіх пялоцоўках, і паспрабавалі весяліць народ і ўнесці свой уклад у святочны настрой: паспявалі, патанцавалі, паігралі на музычных інструментах, і дэманстравалі навыкі жанглёраў. Ну, і канешне, начаставаліся самымі рознымі прысмакамі так, што абедаць і вячэраць можна да дому былі і не ісці. Да таго ж накуплялі пакрыху і з сабою…

Госці са свята “таксама вязлі са свята не толькі ўражанні ад сустрэчы з сямейнымі калектывамі, але і шматлікія сувеніры і вырабы народных умельцаў. Пабываўшы на свяце “Пад дахам дома твайго”, удзельнікі маглі прыдбаць на святочным кірмашы саламяныя і вышываныя вырабы, карціны мастакоў, вырабы народнай кухні, хатнія віна, рыбу, мёд, капусту, грыбы і іншае…

Кульмінацыяй свята стаў гала-канцэрт у залі ГДК, падчас якога ўсе ўдзельнікі былі ўзнагароджаныя граматамі і дыпломамі. З нашых граматамі арганізацыйнага камітыта свята адзначылі сямейны ансамбль “Манаполька”, ансамбль “Талака”, народны духавы аркестр, эстрадная студыя “Правінцыя”, жыпломамі 3 ступені ўзнагародзілі сям’ю Цецердынка і сям’ю Макаедаў, дыпломы 1 ступені атрымала сям’я Рылкаў і сям’я Купрыянік, а сям’я Бондараў атрымала дыплом лаўрэатаў свята. Кіраўнік упраўлення культуры Брэсцкага аблвыканкама Рыгор Бысюк сказаў, што вельмі ўражаны горадам і мясцовымі жыхарамі. “Мы шмат святаў правялі, і ўсюды было па-рознаму. Аднак такую шчырую публіку сустракаю ўпершыню. Вы так шчодра адорвалі удзельнікаў апладысментамі, проста цудоўна. Вялікі дзякуй вам”, — сказаў Рыгор Рыгоравіч.

Новости

Из рубрики
Top