Калектыў «Хатовічы» выступіў у рэспубліканскім фестывалі

Самадзейнаму калектыву Хатыніцкага СДК было даверана абараняць гонар Брэсцкай вобласці і перадаць вопыт самабытнага фальклорнага жанру дзіцячым калектывам. Калектыў «Хатовічы» быў адабраны камісіяй упраўлення культуры Брэстчыны падчас падцверджання звання народнага калектыва. Такі гонар яны заслужылі, бо змаглі захаваць аўтэнтычныя песні і традыцыі сваіх бабуль і дзядуль, якіх больш няма нідзе на тэрыторыі Беларусі.

Як распавяла адна з удзельніц калектыва Таццяна Буйкевіч, на фэсце акрамя іх Брэсцкую вобласць прадстаўляў таксама дзіцячы калектыў «Дараносіца»  з Брэста. «Хоць фэст і лічыцца дзіцячым, на яго прыехалі і сталыя калектывы, каб перадаць маладому пакаленню свае даўнія традыцыі», — расказала Таццяна.

На свята прыехала больш за 800 аматараў народнага мастацтва і навукоўцаў з усіх куткоў Беларусі, а таксама з Польшчы, Украіны, Расіі, Малдовы, Латвіі і Літвы.  Калектывы прадстаўлялі асноўныя жанры народнай культуры: музыку, песні, танцы, гульнявы фальклор і дэкаратыўна-прыкладное мастацтва.

Нашы артысты выступалі на прэзентацыі аўтэнтычных гуртоў, дзе выканалі старажытныя фальклорныя песні, і дзе хатынічкія самадзейныя артысты вызначыліся тым, што прадставілі хатынаўскія народныя творы, якія спявалі некалькі сотняў гадоў, словы да якіх складалі мясцовыя паэты.

«Фестываль нам вельмі спадабаўся, было весяла, цікава, у нас засталося многа станоўчых уражанняў. Многія былі ў захапленні ад нашых народных касцюмаў ручной работы. У калоне на фоне іншых удзельнікаў, мы выдзяліліся маляўнічай, яркай плямай», – распавяла Таццяна.

Даведка «ГЧ». Фестываль «Берагіня ўзнік на аснове жывой аўтэнтычнай культуры беларусаў і з’яўляецца візітнай карткай Гомельскай вобласці. Першы фестываль праходзіў у 1998-1999 гадах у межах раёна, другі ў 2001 году ахапіў Гомельскую вобласць. Пачынальна з трэцяга фестывалю ў 2004 году, ён атрымаў статут рэспубліканскага.