search

Футбольны матч з элементамі кулачнага бою

Баявой нічыёй і кулачным боем запомніўся ганцаўчанам адказны матч 1-га тура цяперашніх лідэраў Усходняй зоны чэмпіянату Брэсцкай вобласці па футболе паміж ФК “Ганцавічы” і камандай “Белсолад” Іванаўскага раёна, які прайшоў у Ганцавічах 29 чэрвеня.

Выдаленаму абаронцу ФК «Ганцавічы» пасля «кулачнага бою» спатрэбілася медыцынская дапамога
Выдаленаму абаронцу ФК «Ганцавічы» пасля «кулачнага бою» спатрэбілася медыцынская дапамога / Фото: Пётр Гузаевский

Каля паўтысячы аматараў футбола, якія наведалі гэты матч, змаглі паглядзець захапляльную, цікавую і багатую на вострыя моманты гульню, накал якой напрыканцы скончыўся патасоўкай, і на поле на дапамогу суддзям прыйшлося выбегчы работнікам міліцыі.

У першым тайме перавага ФК “Ганцавічы” была відавочнай, і лік на табло пасля яго завяршэння гэта пацвярджаў – 2:0. І ў пачатку другой паловы матча ганцаўчане гаспадарылі каля варот іванаўскіх футбалістаў. Шэсць ці сем момантаў за 10 хвілін маглі б завяршыцца галамі. Некалькі разоў мяч трапляў у перакладзіну, пралятаў побач са штангай, і іванаўскі варатар таксама не раз ратаваў сваю каманду.

А потым спрацавала няпісанае правіла: не забіваеш ты – забіваюць табе. Так і здарылася: “Белсолад” правёў некалькі контраатак і літаральна з прамежкам у дзве-тры хвіліны аднавіў раўнавагу. Лік 2:2 так і пратрымаўся за завяршэння сустрэчы.

Але напрыканцы сустрэчы сапернікі не змаглі стрымаць эмоцый. За некалькі хвілін перад фінальным свістком у гульнёвым моманце іванаўскі футбаліст у штрафной пляцоўцы ФК “Ганцавічы” нанёс удар нашаму абаронцу па нагах, за што атрымаў жоўтую картку. Наш футбаліст, відаць, палічыў, што гэтага мала, і ўжо пасля свістка арбітра дадаў да “гарчычніка” дадатковае пакаранне: нанёс удар кулаком у галаву свайму крыўдзіцелю. Суддзя на гэта адрэагаваў чырвонай карткай і папрасіў нашага іграка пакінуць поле. Іванаўскі футбаліст таксама аказаўся з “гарачай крывёю” і кінуўся ў бойку. Ігракі з “Белсолада” пачалі супыняць свайго таварыша па камандзе, але той выкручваўся і зноў кідаўся на свайго крыдзіцеля. На полі пачалася патасоўка. Футбалісты ў чырвоных і жоўтых майках цэлым натоўпам тузаліся між сабою, а разам з імі і суддзі, якія імкнуліся разбараніць футбалістаў, што забыліся пра спартыўныя паводзіны і дэманстаравалі свае здольнасці ў баі без правіл.

Супакоілі разбушаваных спартсменаў міліцыянеры. Завадатараў выцягнулі з натоўпу, і пасля невялікага перапынку матч прадоўжыўся, а праз некалькі хвілін завяршыўся. Але некаторым байцам усё ж спатрэбілася медыцынская дапамога…

Бясплатны футбол з элементамі рукапашнай схваткі спадабаўся многім гледачам, хоць пакінуў і непрыемны асадак. Бо ў горадзе Ганцавічы, дзе на стадыён прыходзіць большая, чым у іншых гарадах вобласці, колькасць балельшчыкаў, гасцей так прымаць не заведзена. Для кулачных баёў ёсць рынг, ды гэта ўжо іншы від спорту.

Новости

Из рубрики